KUWADERNO.COM

Different Genres.

One Name.

One Soul.

One Addicition.

KUWADERNO.COM

Different Genres.

One Name.

One Soul.

One Addicition.

Blog Post

Kinaray-a News: LMP magapadayon suporta sa mga naga-uli nga LSIs, OFWs

March 14, 2021 Uncategorized

SAN JOSE, Antique, Agosto 3 (PIA)  – – Nagpasalig ang League of Municipalities (LMP)  sa Antique sang padayon nga naga suporta sa mga naga-uli nga Antiqueños  sa tunga kang paghangkat ka pandemya nga  COVID-19.

Si LMP President Mayor Mary Jean Nicopior-Te ka Libertad nagadayaw sa suporta nga ginatao kang mga alkalde sa anda nasakupan nga Locally Stranded Individuals (LSIs) kag returning overseas Filipino workers  (OFWs)   bisan pa nga nagabuhin ang andang pondo.

Ana man ginhambal nga sa tunga kang kabudlay, wara gid sanda nakapoy agud mapasigurado nga protektado ang anda nasakupan kontra sa COVID-19.

Kang Hulyo 30, ang Antique ang may pinakaraku nga numero kang LSI sa rehiyon 6 nga may 8,107 lakip na ang mga sakada nga halin sa isla kang Negros kag 935 ka mga OFWs.

Ang Hatid Tulong nga programa kang gobyerno nasyonal nakapatigayon  man nga magpauli kang 71 ka mga LSIs kag sanda dya gindara sa andang mga banwa bilang pagsunod sa proseso kang ‘quarantine.”

Kang nagligad nga bulan kang Hunyo kag Hulyo linibo ka mga Antiqueño halin sa Luzon ang nauna nga nakauli paagi sa programa nga “Libre Uli Antique” nanday Governor Rhodora Cadiao kag Deputy Speaker/Antique Lone District representative Loren Legarda.

Ginpasalamatan man ni Cadiao ang mga lideres kang banwa nga wara gid ginakakapoy sa pagprotektar kang andang nasakupan.

Ana ginhalbal liwan ang padayon nga suporta kang gobyerno probinsyal sa lihuk kang mga kabanwahan. 

Gin-anunsyo na man ang pagabot kang ‘wing van’ nga ginbakal kang probinsya para magbulig sa pagdeliver kang mga bulong kag suplay medikal sa mga banwa.

Ginpanugyan gid ni Cadiao nga ang tanan nga naga-uli dapat magsunod  sa patakaran nga ginapatuman kang IATF para malikawan ang pagduro kang COVID-19.

Si DILG Provincial Director Cheryl P. Tacda  nagpadumdum man sa tanan nga naga-uli  nga magbuol kang sulat nga may koordinasyon sanda sa mga banwa antes sanda mag-uli para sa tayuyon nga pagproseso kang andang kinahanglanon. (JBG/psm/PIA-Antique)

source https://pia.gov.ph/news/articles/1049300

Leave a Reply

This site uses Akismet to reduce spam. Learn how your comment data is processed.

%d bloggers like this: