KUWADERNO.COM

Different Genres.

One Name.

One Soul.

One Addicition.

KUWADERNO.COM

Different Genres.

One Name.

One Soul.

One Addicition.

Blog Post

Hiligaynon News: WV nangin matawhay sa tion sang SONA

March 14, 2021 Uncategorized

SYUDAD SANG ILOILO, Hulyo 28 (PIA) – Nangin malinong kag matawhay ang bug-os nga Rehiyon 6 sa tion sang pagpatigayon sang ika-5 nga State of the Nation Address (SONA) ni Presidente Rodrigo Duterte.

Suno kay Lieutenant Colonel Gilbert Gorero, tagpamaba sang Police Regional Office 6, nangin matawhay ang security coverage sang mga kapulisan sa bug-os nga rehiyon kahapon, Hulyo 27, para sa SONA.

Suno man sa iya nga sa mga nagpatigayon sang rally o kon protesta, hugot nga ginbantayan sang kapulisan ang pagsunod sang standard health protocol kasubong sang pagsuksok sang face mask kag pag social distancing santo sa guideline nga ginapatuman sa idalom sang General Community Quarantine.

Ginpahayag man ni Gorero nga dako ang nabulig sang pagtukod sang Task Group SONA 2020 para nangin organisado ang pagsekyar kag pagmonitor sang mga hilikuton kag mga tawo nga luyag magsabwag sang kagamo sa mga lugar sa kaprobinsyahanan.

Ang tanan nga ginapatigayon nga mga hilikuton ang hugot nga ginmonitor sang PRO6 Regional Tactical Operation Center.

Nahibaluan nga may mga lokal nga pamunuan sa syudad kag kaprobinsyahanan nga naghatag sang permiso para sa pagpatigayon sang rally sang pila ka mga grupo.

Suno pa kay Gorero nga pila lamang ka mga rally, caravan kag pagtililipon ang ginpatigayon sa tion sang SONA kahapon, kag magamay man nga mga gupo ang nagpasakop diri.

Kalakip sa mga lugar nga may ginpatigayon nga rally ang Kalibo sa Aklan, Roxas City sa Capiz, Kabankalan sa  Negros Occidental, Bacolod City kag Iloilo City.

Wala man sang may na aresto sa grupo sang mga reliyesta bangud sa paglapas sang ginapasunod nga health protocols

Samtang, nagpasalamat naman si PRO 6 Regional Director Brigadier General Rene Pamuspusan  sa kooperasyon kag paghangop sang tanan sa tunga sang sini nga pandemya ilabi na ang pagpaiway sa pagtililipon para malikawan kag mapaiway ang paglapta sang COVID-19. (JBG/CBA-PIA6)

source https://pia.gov.ph/news/articles/1048759

Leave a Reply

This site uses Akismet to reduce spam. Learn how your comment data is processed.

%d bloggers like this: