KUWADERNO.COM

Different Genres.

One Name.

One Soul.

One Addicition.

KUWADERNO.COM

Different Genres.

One Name.

One Soul.

One Addicition.

Blog Post

Cebuano News: Tabang panginabuhi-an gitunol sa 44 kanhi rebelde sa Bohol

March 14, 2021 Uncategorized

CORTES, Bohol, Sept. 7 (PIA) –- Kahamugaway sa kinabuhing malinawon, layo na sa tun-og ug lubat-lubat nga maapsan sa mga patrolya, ug karon may libre nga panginabuhi-an pa ang nadawat sa 44 ka mga kanhi nga rebelde nga karon nakahunahuna na sa kawalay hinungdan sa ilang kinabuhi nga gigamit lamang sa uban.

Niining bag-o lamang, ang kagamhanan nga ilang tumong nga lumpagon, mao pay minghatag pinaagi sa Department of Trade and Industry (DTI), 47th Infantry Battalion sa Philippine Army ug Kagamhanang Probinsyal sa Bohol ang mitugyan niadtong Biyernes, sa tagsa-tagsa ka livelihood starter kits nga tag P10,000 didto sa Ceremonial Hall sa Kapitolyo.

NAGKADAGHAN NA NGA NAKASABUT.  Human sa gipalapdan nga kampanya sa kagamhanan sa pagpaundang na sa armadong pakigbisug sa termino ni Presidente Duterte, nagkadaghan na ang mga Bol-anon nga nanabok balik sa dalan sa kalinaw. (rahc/PIA-7/Bohol)

Ang kinatibuk-an nga P440, 000 nga Negosyo Kits mga nagkadaiya nga starter kit alang sa mini grocery, pangbugasan, panghayupan sama sa pangkandingan, baboyan, bakahan ug manokan, may mga pagkaon sa mga hayopan ug bitamina, pang-itlogan, capital alang sa bahalinahan, pangbakery, pang agrivet ug pangumahan, segun pa ni IlT Elma Grace Remonde-Arbulencia, information officer ug Civil Military Operations Officer sa 47IB.

Kini gitunol nila ni DTI Provincial Director Maria Soledad L Balistoy uban ni DTI Assistant Secretary Asteria Caberte, Gobernador Arthur Yap, Vice Governor Rene Relampagos, Kongresista Edgar Chatto, representante ni Kongresista Aris Aumentado ug Army Major Mozart Jaque, ang Battalion Executive Officer sa 47IB.

Una na nga naghimo og assessment ang DTI ugang mga rebelde nga karon mipili na sa kinabuhi nga layo sa kakuyaw ug kagubot.

Ang hinabang sa kagamhanan kabahin sa Enhanced Comprehensive Local Integration Program (E-CLIP) aron abagan ang mga kanhi rebelde nga karon kauban na sa kaugmaran, sa ilang pagtipo og balik sa katilingban nga linaw nga nanginabuhi.

Ang 44 ka mga kanhi rebelde, dinhi naglibotlibot sa Bohol ug boluntaryo na nga mitahan sa ilang kaugalingon ug gitabangan sa ECLIP.

Sa laing bahin, ang pagpanghatag sa tabang kapanginabuhi-an ngadto sa mga kanhi rebelde, kabahin sa “Pangkabuhayan sa pag Bangon at Ginhawa” nga programa sa DTI.

Kining programa, nagtumong sa  pag-pataas sa kahimtang sa mga namuhunan ilabi na niadtong may gagmay lamang nga puhunan, segun usab sa rekomendasyon sa Provincial Task Force ELCAC.

Segun pa sa usa sa mga kanhi rebelde nga mingdawat, “ang tabang nga among nadawat karon, bisan pag unsa ka gamay alang sa uban, daku na kayo alang kanamo.”

Matud ni alias Ka Berting, “niini, makasugod na kami og panginabuhi-an uban sa among pamilya nga among nabiyaan niadtong nahungog pa kami sa bakak nga saad.”

“Nagmapasalamaton kami sa daku nga hinabang nga gihatag sa kagamhanan ug kami nana-ad nga among paningkamotan nga mogaya kini nga negosyo aron dili ma-usik ang tabang gikan sa kagamhanan,” dugang niya.

Agi og dugang saad, gipanumpa ni Ka Berting nga manginlabut na siya ug manguna sa kampanya batok sa insurhensya.

Sa laing bahin, si Jaque, Battalion Executive Officer sa 47IB, mipadayag sa ilang gaimbuhaton sa pagtagad sa aghat ni Presidente Rodrigo Duterte nga taposon na ang local nga armadong pagpakigbisug dinhi sa Bohol.

“Ang tabang panginabuhi-an nga inyong nadawat karon gikan sa sinsero nga tinabangay sa mga ahensya sa kagamhanan aron makasugod kamo sa pagpuyo nga malinawon ug magsugod sa bag-ong kinabuhi uban sa inyong mga banay,” matud sa opisyal.

“Sa atong paghiusa, ato nga ikapatunhay ang kahapsay ug kalinaw dinhi sa lalawigan sa Bohol,” panapos ni Maj Jaque. (rahc/PIABohol uban ni 1Lt. Grace Arbulencia)

source https://pia.gov.ph/news/articles/1052406

Leave a Reply

This site uses Akismet to reduce spam. Learn how your comment data is processed.

%d bloggers like this: