KUWADERNO.COM

Different Genres.

One Name.

One Soul.

One Addicition.

KUWADERNO.COM

Different Genres.

One Name.

One Soul.

One Addicition.

Blog Post

Cebuano News: Ikuyog ang kampanya batok dengue sa anti-COVID-19

March 14, 2021 Uncategorized

TAGBILARAN CITY, Bohol, June 26 (PIA) — Ikuyog ang pagkampanya sa dengue sa pagpakigbatok sa coronavirus disease (COVID-19).

Kini maoy gi-aghat ni Leonidas Saniel, Dengue Focal Person ug usa  ka nurse sa Provincial Health Office (PHO) didto sa Kapihan sa PIA nga naghisgut sa Dengue sa panahons a pandemya.

KON NAHIMO SA USA KA BARANGAY, NGANONG DILI MAHIMO SA UBAN? Napamatud-an na nga mahimong pildehon ang dengue, usa ka barangay sa Cortes ang may malampuson nga sugilanon kabahin niini, matud ni Leonidas Saniel didto sa Kapihan sa PIA. (PIA Bohol) 

Kini usab dungan sa taho nga milabaw na og 37.83 ka kaso sa dengue ang natala gikan sa Enero ngadto sa Hunyo 13 niining tuig 2020 kon itandi sa susamang higayon niadtong 2019.

Sa taho ni Saniel, miabut na sa 2,481 ka kaso sa dengue  ang natala sa Bohol, taho nga gihiusa gikan sa mga disease reporting units sa kalungsurran gikan sa Enero ngadto sa Hunyo 13, 2020.

Kini, dugang niya, 37.83 ka porsyento nga pagsulbong kon itandi sa mga natala nga kaso sa miagi nga tuig.

Segun sa Center for Health and Development VII Regional Epidemiology and Surveillance Unit, sa ika 24 nga morbidity week, 13 na usab ka kinabuhi ang nakalas sa nahisgutang sakit sa mga buwan nga gitumbok.

Kahinumduman nga sa 2019, gikan sa Enero nagdto sa Hunyo 13, natala lamang ang 1,800 ka kaso ug 17 ang namatay.

Walay gipili ang dengue, bata man o tiguwang, kay segun sa RESU ang mga namatay sa Bohol, may 2 ka buwan nga puya ug may 94 anyos usab.

Subay sa RESU, mas daghang lalaki ang nasakit sa dengue, kay 51.9 porsyento sa mga nataho nag kaso naglambigit sa mga kalalakin-an.

Giangkon, matud pa ni Saniel, sa mga barangay officials ug mga local nga tinugyanan nga ilang nataligam-an ang pagbatok sa dengue, kay ang tanang tawo nahingawa na sa pagpakigbugno sa COVID-19. 

Sa nagpadayon nga pagpakigsangka sa corona virus disease, mihangyo ang mga tinugyanan sa kasanihan nga unta, ikuyog ang pagpakig-bugno sa covid sa pagpakigbugno sa lamok.

Samtang naa lamang sa balay kay gimandu man sa balaod, unta sa mga alas 4:00 sa palis, moguwa sa silinganan ug manglimpyo, tikwangon ang mga kapangitlogan sa lamok, hinloan ang silinganan ug pangitaon tong mga lugar kaitlogan sa lamok aron hikawan na sila sa pagsanay, aghat ni Saniel.

Ug kon nagtuo kita nga ang lamok sa dengue sa balay lamang magpuyo?

Matud ni Saniel, duha  ka matang  sa lamok nga nagdalag dengue ang karon ilang gibantayan: kadtong aedes aegypti nga ganahan mopuyo sa mga hugaw ug ngitngit nga parte sa balay, ug  ang aedes albopictus o ang Asian Tiger Mosquito nga mahilig sa gawas sa balay.

Permiha nga limpyo ug hapsay ang balay ug limpyohi ang silinganan aron wala nay katagu-an ang lamok, pahinumdom ni Saniel samtang iyang gibutyag nga nasuwayan na sa usa  ka barangay sa Bohol nga wala nay kaso sa dengue human nila buhata ang angayan buhaton human may 53 ka kaso sa dengue sa ilang barangay sa usa  ka tuig.  

Dili tinuod nga dili mawala ang dengue, ang tinuod, kon magpabilin ang kiinaiya nga tapulan, magpabilin gihapon ang dengue nga suliran, panapos ni Saniel. (rahc/PIA-7/Bohol)

 

source https://pia.gov.ph/news/articles/1045887

Leave a Reply

This site uses Akismet to reduce spam. Learn how your comment data is processed.

%d bloggers like this: