KUWADERNO.COM

Different Genres.

One Name.

One Soul.

One Addicition.

KUWADERNO.COM

Different Genres.

One Name.

One Soul.

One Addicition.

Blog Post

Aklanon News: ‘Palengke Online’ direkta nga daehon ro mga produkto sa mga Aklanon

March 14, 2021 Uncategorized

KALIBO, Aklan, Hulyo 23 (PIA) —  Nagapanawagan ro Office of the Provincial Agriculturist (OPA) sa mga Akeanon nga magpamakae sanda it lokal nga produkto it mga mangunguma paagi sa Aklan Palengke Online (APO) kon siin ro mismo ngara nga mga baligya hay pwede daehon sa andang mga baeay.

Ro Aklan Palengke Onlline hay sangka pamaagi sa pagbaligya it mga produkto it mga Aklanon nga mangunguma ag mangingisda bilang pagbulig man kanda, suno sa OPA-Aklan.

Paagi sa rayang proyekto nga ginpangunahan it OPA-Aklan ag suportado man it gobyerno probinsyal, ro mga manugbakae hay maka order ku andang gustong bakeon paagi sa “online” halin it Dominggo hasta it Martes sa alas 12:00 it adlaw.

Ro pagbuoe hay kada Huwebes halin sa alas 8:00 sa agahon hasta it alas 4:00 sa hapon sa adlaw it “Tinda.”

Pwede man i-deliver ro mga produkto paagi sa mga katuwang it OPA-Aklan nga manug deliver pero may kadugangan ra nga bayad bangud owa haeakot ro sukot sa pag deliver sa presyo.

Ro ginatawag nga “Tinda” it OPA-Aklan hay una sa Aklan Palengke Sa Kapitolyo nga mabuhay-buhay eon nga nangin oportunidad sa mga lokal nga mga mangunguma ag mangingisda sa pagbaligya ku andang produkto direkta sa mga manugbakae nga kaeabanan hay mga empleyado it Kapitolyo, mga kliyente nga naga adto sa mga sari-saring ahensya it gobyerno nga una man sa palibot, ag iba pa nga naga agi eamang.

Paagi sa Aklan Palengke Online, ginaeauman nga mas maeayu ro hiabutan it mga produkto it mga mangunguma ag mangingisda.

Mabuoe man eagi it mga mangunguma ag magamit ro andang kwarta bangud direkta nga magabayad kanda ro mga nagbakae paagi sa “online”, kon hibuoe eon ro produkto, ukon sa pag deliver sa mga panimaeay.

Suno  kay Salome David, Assistant Provincial Agriculturist it OPA-Aklan, nagapatigayon pa gid sanda makaron it pag inventaryo it mga mangunguma sa sari-saring parte it Aklan nga interesado nga magbaligya ku andang mga produkto paagi sa Aklan Palengke Online agud abu pa kanda ro maka supply it mga produkto ag abu man ro mabuligan sa pagbaligya kara.

Gindugang pa gid ni David nga tanan nga mga produkto nga ginabaligya paagi sa Aklan Palengke Online hay sa Aklan gid maghalin ag gintanum, bangud gusto gid nanda nga buligan ro mga mangunguma.  Sangka paagi man ra, suno kana, sa pagkumbinyu sa mga mangunguma nga magtanum pa gid it abu.  Mangin pangmabuhayan ro proyekto ngara, hambae pa gid ni David.  (JSC/VGV/PIA6 Aklan)

source https://pia.gov.ph/news/articles/1048349

Leave a Reply

This site uses Akismet to reduce spam. Learn how your comment data is processed.

%d bloggers like this: