KUWADERNO.COM

Different Genres.

One Name.

One Soul.

One Addicition.

KUWADERNO.COM

Different Genres.

One Name.

One Soul.

One Addicition.

Blog Post

Aklanon News: Importansya it mga PWDs ginpabatyag it Banwang Kalibo

March 14, 2021 Uncategorized

KALIBO, Aklan, Septyembre 10 (PIA) —  Makita makaron sa mga mayor nga kalye sa Kalibo ro mga markado nga pedestrian lane ag parkingan it mga saeakyan para sa mga Akeanon nga may diperensya sa eawas ukon mga Persons With Disabilities (PWDs).

Raya hay sambilog sa pamaagi it banwang Kalibo nga ipabatyag nga  ro mga PWDs hay importante ag ginapahaegahan it gobyerno.

Padayon makaron ro pagbinutang it mga pedestrian lanes ag parkingan sa Kalibo, kon siin ro nakaplastar eon kara hay una sa prente it Kalibo Shopping Center, sa likod it Kalibo Pastrana Park, ag sa prente it sangka kolehiyo sa banwa.

Natigayon ro pagbutang it mga pedestrian lanes para sa mga PWDs paagi sa ginproponer ni Mauro Samson, nagapamuno it  Municipal  Disabilities Affairs Office (MDAO) – Kalibo sa Sangguniang Bayan, samtang ro pagbutang it parkingan para sa mga PWDs hay resulta man it pagsueat ni Randy Rebaldo, pinuno it Provincial Disability Affairs Office (PDAO) sa imaw man nga upisina nga nagaayo sa munisipyo it Kalibo nga magbutang kara.

Eagi-eagi nga nakabuoe it pag-aprobar halin kay Mayor Emerson Lachica ro nasambit nga pangabay bangud man sa pagsuporta it Sangguniang Bayan.

Bangud pa gid kara hay gintaw-an eon it dugalingon nga upisina sa sueod it munisipyo ro mga PWDs ni Mayor Lachica.

Antes kara, una ro MDAO naga upisina sa sueod it Municipal Social Welfare and Development Office.

Ro pagbutang it pedestrian lanes ag parking slots hay nangin tayuyon ku buean it Agusto pero ro kabaeaka it munisipyo para sa mga PWDs it banwa ag sa bilog nga Aklan hay ginpaabot sa sektor ngara paagi sa mensahe ni Mayor Emerson Lachica sa ginpatigayon nga 42nd National Disability and Rehabilitation Week ku Hulyo.

Hambae nana: Para sa ikamayad it atong PWDs, atong obrahon ra iya sa banwa it Kalibo. Padayon naton nga suportahan ag taw-an it haega ro atong mga igmanghod nga PWDS.”

Ro pagpinta it mga pedestrian lanes ag parkingan hay ginpatigayon it Office of the Municipal Engineer it Kalibo.

Agud maobra man ra sa mga mayor nga nasyonal nga karsada para sa kaeuwasan it mga PWDs, ro Kalibo Sangguniang Bayan hay nagpasa man it sangka resolusyon nga naga apelar sa Department of Public Works and Highways (DPWH) mag obra man it makara. (JSC/VGV/PIA6 Aklan)

source https://pia.gov.ph/news/articles/1052665

Leave a Reply

This site uses Akismet to reduce spam. Learn how your comment data is processed.

%d bloggers like this: